Kunuke umsizi amaphoyisa edubula abokufika eThekwini
Sihle Mkhize
Bazolala bengayithandi indaba abantu bokufika abebeqhinqe eDurban Central Police Station befuna ukuvikelwa amaphoyisa ngenkani.
Abakwasidlodlo babadubule ngezinhlamvu zenjoloba bachitheka bagcwala izitaladi zeTheku.
Amaphoyisa abaqhube baze bayofika ePhoyinti lapho kuyisizinda sabo, abanye babo baveza amanxeba abawathole ngesikhathi bedutshulwa ngezinhlamvu zenjoloba.
Owasifazane odabuka eCongo othi wafika kuleli ngo-2011 uthi bathathe lesi sinqumo sokuqhinqa eDurban Central Police Station ngoba kunezinsongo abazitholayo emphakathini.
“Kungani kumele silinde amathonsi abanzi ngoba izinsongo zikhona sithe asize la singalindi usuku olungamnqamlajuqu njengoba kuthiwa asifuneki kuleli”
“Mina ngifike la eSouth Africa ngizofunda. Ibhizinisi lami ebengilenza livaliwe. Labantu bathatha izinto ezisidayisayo emasaloon bathi asigoduke, ” usho kanje.
Omunye wesilisa obekhuluma nabezindaba uthe sebekhathe ukuphila njengezinja eNingizimu Africa.
“Sicela uhulumeni enze izinhlelo asibuyisele emakhaya ngeke siphile ngokugunda abantu amakhanda sibe ngonogada. Kumanje sigcwele umgwaqo asiyile emsebenzini”
Lishone elangoLwesibili abanye bethutheleka eDiakonia Hall enkabeni yeTheku labo kuquba khona abantu ababelekela izimpi emazweni wabo.
Kuzokhumbuleka ukuthi babekelwe unqamlajuqu wangomhla ka-30 June ukuba babone abafika ngayo labo abangenamaphepha.
Marketing and advertising Call or WhatsApp 073 062 1169
