Zikhala ebhantshini kuMchunu kwiMadlanga Commission
Bahle Mkhize
UMajor General Petronella Margaretha Van Rooyen oyiComponent Head of Governance, Legislation and Policy emaphoyiseni uhlube indlubu ekhasini kwiMadlanga Commission ngoLwesine.
UVan Rooyen ubezochaza ngokusebenza kwamaphoyisa, nesipiliyoni sakhe seminyaka engu-44 esemaphoyiseni.
Phambili uKhomishana uMasemola uthuse abaningi ehlanza ayekudle ngayizolo ngoMchunu.
UMasemola uthi wadinwa kwathi akaqhume uNqongqoshe ezwa ngokuboshwa kwaPhendukani Mabhida.
UMabhida wabe elikhansela le-ANC kuMasipala waseMandeni kanti abambulala baboshwa uphiko lwamaphoyisa olusematheni kumanje.
UVan Rooyen uthi uNgqongqongqoshe wamaPhoyisa kuzwelonke uMnuz Senzo Mchunu wayengenawo amandla okuhlakaza iPolitical Killings Task Team.
Udalule ukuthi umthetho uthi leso sinqumo singathathwa uKhomishana kazwelonke uFannie Masemola.
Ugcizelele nelokuthi ngisho noMengameli akwazi ukuhlakaza iPolitical Killings Task Team eyasungulwa KwaZulu-Natal ngenhloso yokulwisana nokubulawa kosopolitiki.
UVan Rooyen akamshiyanga ngaphandle uGeneral Shadrack Sibiya athi wenza okungafanele ngesikhathi esayina umbiko okwahlela ukuhlakazwa kwePolitical Killings Task Team.
Uthi Sibiya kwakumele akhulume noGeneral Fannie Masemola ngaphambi kokuthi aphendule uNgqongqoshe uSenzo Mchunu.
NePortfolio Committee yase Phalamende uyigxekile ethi kwakumele kube khona ekwenzayo emva kokuthi uGeneral Nhlanhla Mkhwanazi ekhulume nabo mayelana nalezi zinkinga ngoMarch.
UMajor General Van Rooyen ukhale kakhulu ngokugxambukela kwepolitiki ekusebenzeni kwamaphoyisa.
Namhlanje usuku lwesikhombisa ihleli iMadlanga Commision.
NoMchunu kulindeleke ukuthi abizwe azobeka uhlangothi lwakhe kulezi zinsolo.
