Kucekelwe phansi inqwaba yezibhamu okuhlanganisa ezaseKZN
UKhomishana wamaPhoyisa kuwelonke, uGeneral Fannie Masemola uhole uhlelo lokufahlaza inqwaba yezibhamu namuhla ekuseni, eVanderbijlpark.
Ekhuluma nabezindaba uMasemula uthe: “Namuhla kuphawula ingqophamlando emkhankasweni wethu oqhubekayo wokulwa nokuqedwa kwezibhamu ezingekho emthethweni.
Kulolu hlelo kufahlazwe izibhamu ezingu-12 499.
Kulesi sibalo, iGauteng ilethe izibhamu eziningi ezingu-5099 ilandelwa yiWestern Cape ngo-2333, iKZN ilandele ngo-1574, 1432 ezase-Eastern Cape kanti zingu-460 zaseFree State.
ILimpopo ilethe ezingu-343 kwathi iMpumalanga yanikela ezingu-519, kwaba ngu-417 waseNorth West no-322 waseNorthern Cape.
“Kusukela ngoMashi ka-2019 kuze kube manje, zingu-292 092 izibhamu ezicekelwe phansi ngenxa yezinhlelo zethu zokucekela phansi izibhamu,” kuqhubeka uMasemula.
Khonamanjalo, uMasemola usekuqinisekisile ukuthi ziqinisiwe ezokuphepha emzini kamkhuzi wamaphoyisa KwaZulu, u-Lt. General Nhlanhla Mkhwanazi emuva kwezinsongo azitholile zokumthuma uphuthu.
Uthe angeke ashushiswe uMkhwanazi ngokudedela ulwazi olushaqise izwe lonke ngobudlwelane bukangqongqoshe wamaphoyisa kuzwelonke, uMnuz Senzo Mchunu nezigebengu ezimbili, uMnuz Vusumuzi Cat Matlala noMnuz Brown Mogotsi.
UMasemola uveze nokuthi bakulungele ukuhlala phansi noMengameli bambikele wonke amahlazo enzekayo ngaphakathi embuthweni.
NB: Marketing & Advertising WhatsApp/Call-073 062 1169
