‘UZuma wayengafuni ukuthi indodakazi yakhe iyogana inkosi uMswati’
Zimi emthumini kwithimba elijutshwe uMakhosetive “Mswati III” Dlamini ukuyolubutuzela amagabade eNkandla.
Lokhu kuza emuva kokweqa kwendlovukazi uNoncebo Zuma-Dlamini esigodlweni ekhaliswa “ukungamboni” umyeni.
Ezivelayo manje zithi kwasekuqaleni uyise wendlovukazi uMnuz Jacob Zuma wayengayizwa eyokuthi indodakazi yakhe iyogana uMswati.
Ilungu lomndeni waseNdlunkulu yesizwe samaSwazi litshele iLanga ukuthi izindlovukazi ziyachazelwa ukuthi kuyenzeka kuphele isikhathi eside bengakwazi ukuhlangana nomyeni wabo.
“Ngikhuluma nje kunabanye ondlunkulu osekuphele unyaka bengakaze bahlangane neNgonyama,” kusho umthombo .
Uqhube wathi kusukela ekuqaleni kwakunenkinga nje ngoba uZuma (uyise kaNomcebo) wayengafuni ukudedela indodakazi yakhe iyogana iNkosi uMswati III.
“Salinda eside isikhathi ngaphandle komuzi engafuni ukusemukela. Emuva kwesikhathi satshelwa ukuthi udinwe wukuthi ugilwe ngumngani wakhe owamkhohlisa”
“Wathi ufuna indodakazi iyogana enye yamadodana akhe, kanti uzifunela yena,”
“Abomndeni wakwaZuma kunendima okwakufanele bayidlale ukuze (indodakazi yabo) izohlala kahle emendweni”
“Inkinga ekhona wukuthi abemindeni yomibili behlulwa wukubheka izinto ezibalulekile, babuka izinga leNgonyama nokuthi ithatha ingane kaZuma,” kusho umthombo.
Kumanje iNkosi inabantwana abangaphezu kwa-50 ebathole kondlunkulu bayo abangu-14.
Ngesikhathi kuvela lezi zindaba ngonyaka odlule uNomcebo eseneminyaka engu-21 nje izakhamizi zaseNingizimu Africa zanengeka yilesi senzo.
Nakuba indlovukazi yayiseneminyaka eyivumelayo kodwa babenengwa ukubona igebe leminyaka engu-35 phakathi kwabo.
Umshado wabo weSintu wabanjelwa eLudzidzini Royal Village eLobamba lapho kwakuphume abantu ababalelwa ngaphezu kwa5000 bezothamela lo mshado.
NB: Marketing & Advertising WhatsApp/Call-073 062 1169
