Akasekho emhlabeni umethuli wezemidlalo uPhumlani Msibi

Angena elakanyana amazwi enduduzo ezinkundleni zokuxhumana kulandela ukushona kwamethuli wezemidlalo kuSupersport uPhumlani Msibi.

Izindaba zokudlula emhlabeni kukaMsibi (57) zimenyezelwe emphakathini iyona i-Supersport ngoLwesihlanu ebusuku.

Le nkakha yomsakazi engeyokudabuka eThekwini, KwaZulu-Natal idlule emhlabeni emuva kokugula isikhashana.

“I-Supersport ibuhlungu ngokudlula emhlabeni kwale nkakha ebisakaza ezemidlalo, uPhumlani Msibi”, ibhale kanjalo i-Supersport ku-X.

“Sifisa ukududuza umndeni, abangani nozakwabo ngokulahlekelwa okukhulu kangaka”.

UMsibi uzakhele igama ekusakazeni ethula isibhakela kanye nebhola emisakazweni yakwa-SABC.

Ungene emsakazweni emuva kokuzwakala kwekhono lakhe ngasekuphetheni kwama-90’s esamemezela emahholo okwenzeka ebhokisini uma kunezimpi.

Ngaleso sikhathi ubejwayele ukusebenzisana nomgqugquzeli wezimpi, uMzi Mnguni.

Uchithe isikhathi esiningi ku-Supersport nokuwumsakazo adlule emhlabeni esebenza kuwona.