Kuphele amahlathi koweqa eboshelwe izinsolo zokudlwengula abafundi
Philasande Luthuli
Uxhakathiswe yiqulu lamaphoyisa ayizidlakela esenyangeni eDalton, eThekwini, umsolwa obezingelwa njengenyamazane.
Uvele kafushane ngawo uLwesine enkantolo yeMantshi yasePinetown ohlonzwe njengo khumbulani Ngubane (28).
Ubefunelwa amacala okudlwengulwa kwabafundi eBizimali High School eNkandla.
UNgubane (28) ubeboshwe esiteshini samaphoyisa esiseMarianhill, eThekwini, ngoMsombuluko emuva kokuthungathwa wosomatekisi baseNkandla.
Bagcine bemthola eTshelimnyama, ePinetown, base bebiza amaphoyisa ukuba azolekelela abanjwe kanti uzokweqa esitokisini.
Ngokwemibiko esabalele kuthiwa umsolwa besekuphele izinsuku ezimbili esenyangeni.
Njengoba esematheni nje kulezi zinsuku umsolwa, inyanga imfanisile yathinta usomatekisi waseBhekisizwe Taxi Assocation emaziyo ukuzoqinisekisa.
Nebala bamhlonza, kwabizwa amaphoyisa aseDalton isinyenyela zakhala.
NgoMsombuluko kuphazamiseke ukufunda nokufundisa abafundi baseBizimali bebhikisha befuna kuboshwe lo msolwa.
Kuzokhumbuleka ukuthi namhlanje, uNgqongqoshe wezeMfundo uMnuz Sipho Hlomuka, osonhlakahle, abaluleki benqondo, amaKhosi ezizwe zaseNkandla bahambele eBizimali ukuyobhula lo mlilo.
NB: Marketing & Advertising WhatsApp/Call-073 062 1169
