Usezikhindini obhadanywe nezibhamu nemifaniswano yeSANDF

Liyah Mseleku

UKHALELWE amasongo kaSigonyela owesilisa oneminyaka engu-48 ubudala oboshwe eNgome, eGreytown, KwaZulu-Natal ngoLwesine.

Lona wesilisa uboshwe ngesikhathi kuqhubeka uphenyo lophiko lamaphoyisa iPietermaritzburg Public Order Policing (POP) Flying Squad, izinkampani zonogada basendaweni beluholwa umasiteshi waseGreytown.

Kuvele ukuthi umsolwa utholakale nezibhamu ezine ezingekho emthethweni nomfaniswano wamasosha akuleli iSouth Africam National Defence Force (SANDF).

Phakathi kwezibhamu ezitholakele kubalwa imijojantaba ye-303 emibili, imikhono yekati emibili nensavunsavu yezinhlamvu.

Okhulumela amaphoyisa esiFunda uMzinyathi, uConstable Siyabonga Nkwanyana, ukuqinisekisile ukuboshwa kwalo wesilisa.

“Amaphoyisa abelunywe indlebe ngomunye osolakala ukuthi unezibhamu ezingekho emthethweni. Athe amaphoyisa efike kule ndawo amthola nezibhamu ezimbili ezinkulu zohlobo lwama-303, nezimbili ezincane (pistol). Ngesikhathi kuqhutshelwa nopheyo, kube sekutholakala nomfaniswano wamasosha,” usho kanje.

Eqhuba uveze ukuthi umsolwa usagcinwe esitokisini eGreytown, kulindeleke ukuthi avale eNkantolo yeMantshi eGreytown maduzane.