Ungqokozwe ngenhlamvu wabulawa owaseZimbabwe
Philasande Luthuli
Ungqokozwe ngenhlamvu wafa owesilisa (45) odabuka eZimbabwe, ePiet River, ngoLwesithathu ebusuku.
Kusolakala amadoda amathathu kulobu bugebengu.
Onogada beReaction Unit South Africa (RUSA) bathi bezwe ngocingo kuyoshaya ihora leshumi ebusuku ukuthi abaphuthune kuPiet Road konakele.
Kuthiwa abasolwa babize umufi ngegama bethi akavule isicabha, kube ukuvula nje kwezwakala kuduma izulu lezandla.
Umakhelwane ophuthume kuqala endaweni yesigameko ufice umufi edindilizile edamini legazi enamanxeba okudutshulwe emqaleni.
Ube eselayishwa emotweni waphuthunyiswa esibhedlela sendawo kodwa ukufa kumanele ngaphambi kokuthi afike.
Akukaziwa imbangela yokubulawa kwakhe.
Khonamanjalo, abasolwa abadabuka eZimbabwe abamataniswa nokufa kwesosha leSANDF baboshiwe.
Izakhamuzi zase-Oukasie zithi zizothola ukuphumula njengoba kuboshwe labantu abathathu nabebehlalise lubhojozi umphakathi.
La basolwa abagcini ngokuthinteka ekubulaweni kwesosha kodwa kunoxhaxha lwamacala okubalwa kuwo ukuphanga kuhlonyiwe namanye.
Sikhuluma nje kubalwa izinsuku njengoba abokufika abangenamaphepha benqunyelwe izinsuku ezingu-30 ukuthi baphume baphele eNingizimu Afrika ngomhla ka-30 June.
Marketing and advertising Call or WhatsApp 073 062 1169
