
UDisemba omuncu koweSafa ogqigqa eNkantolo
Liyah Mseleku
LIHLEHLISELWE uLwesibili womhla ka-10 Disemba icala elibhekene noMengameli weSAFA uMnuz Danny Jordaan nasolwa nabo uMnuz Gronnie Hluyo noMnuz Trevor Neethling.
UJordaan nasolwa nabo bavele ngoLwesine eNkantolo yeMantshi yasePalm Ridge eGoli.
Babhekene namacala athinta inkohlakalo okuthiwa yenzeka phakathi kweminyaka 2014 no-2018.
Ngalesi sikhathi uJordaan wabe esolwa ngokusebenzisa izinsiza seSAFA ezintweni ezithinta impilo yakhe yangasese.
Ngesikathi bevele ngokwedlule enkantolo banikezwa ibhayili yesamba esiwu-R20 000 babe sebeyalelwa ukuba bangaxhumani nofakazi bombuso.
Inhlangano iCivil society organisation #NotInMyName International inxenxa uDanny Jordaan ukuthi ehle esikhundleni.
ISABC ibike ukuthi uJordaan wasebenzisa izimali zenhlangano iSAFA ukuqasha inkampani yezokuxhumana ukuze ipende isithombe esihle ngaye. Wakwenza lokhu emuva kwezinsolo zokudlwengula uJennifer Ferguson owayeyilunga lePhalamende kwi-ANC ngonyaka ka-2017.
UNobhala jikele nophinde abe ngumsunguli we#NotInMyName uThemba Masango wacashunwa ethi: “Ekugcineni amaHawks anqume ukuthi leli cala lithethwe enkantolo kungenzeka kube namanye amacala azokwengezwa. Sijabulile ukuthi ekugcineni leli cala lisenkantolo. Kusenzeka konke lokho sithi akehle esikhundleni kuze kube wukuthi inkantolo imthola emsulwa,” usho kanje.
Masango uphinde wanxenxa uNgqongqoshe wezemiDlalo, ubuCiko namaSiko uGayton Mackenzie ukuthi abese kwikhwelo labo ukuthi akehliswe uJordaan.
Uhulumeni waseNingizimu Africa udinga ukukhuculula ibhodi leSAFA.