Ubulawe eMlazi obefunelwa amacala abucayi
Liya Mseleku
UDUTSHULWE wabulawa amaphoyisa umsolwa obefunelwa amacala okubulala nokubamba izimoto ezithutha imali eMlazi, eThekwini.
Lesi sigameko senzeke ntathakusa ngoLwesithathu esigcemeni sakwaL noF kuleli lokishi.
Ngokombiko wamaPhoyisa umsolwa nomunye abehamba naye bavulele ngenhlamvu uma bemiswa amaphoyisa ekhoneni lomgwaqo uLee Maphumulo noZwelinjani Sibiya.
Umsolwa okunguye obefunwa njengembuzi yomsebenzi usale enkundleni kwathi umngani wakhe wabaleka wagcwala iziganga.
Lo msebenzi wokukhuculula izigilamkhuba ezihlalise lubhojozi umphakathi ubuholwa iDPCI Provincial Tracking Team, DPCI Anti-Gang Unit, okuhlanganisa iNational Priority Violent Crimes Unit yasePMB naseThekwini, Metro Police Special Operations Directorate, Metro Police Trio Crimes, Metro Police Drug Team, Magma Security, Investigations and Fidelity SIU.
Emuva kokudubulana amaphoyisa athole isibhamu somsolwa.
Leli phephandaba ngo-Okthoba libike ngokudutshulwa kubulawe umsolwa eMarrianhill.
Umsolwa umataniswa namacala okufuna imali kubantu ngo “dli” namanye amacala abucayi.
Ngokuthola kwePurpose amaphoyisa abeya kombopha kodwa wawabingelele ngenhlamvu aphindisela nawo wadubuleka wafa.
Ubulawa nje amaphoyisa akwaZulu-Natal akhipha incwadi egunyaza ukuboshwa kwakhe njengoba wayenamacala okukhokhisa imali yokuvikela.
Ngokusho kokhulumela amaphoyisa KwaZulu-Natal uColonel Robert Netshiunda ngaleso sikhathi umsolwa uMnuz Linda Hlengwa, odume ngelikaPutin nelinye elithi Mjinja, wayekade eboshwe ngoJulayi 2020.
