Uboshiwe ummeli ‘ontshontshe’ R8.3 million
Morgan Ngwazi
Zimkhalele ummeli osephucwe amaphepha okusebenza uPetrus Thobejane ngenxa yamacala abucayi.
UThobejane, wasulwa ohlwini labammeli ngoMarch nyakenye, uvele eNkantolo yeMantshi yasePitoli ngoMsombuluko ebhekene namacala angu-31 okweba imali efinyelela ku-R8.3m.
UThobejane (54) uboshwe esemzini wakhe eCenturion ngoLwesihlanu.
“Kusolakala ukuthi phakathi kukaNovember 2024 no-October 2025, uThobejane wasebenzisa indlela efanayo ukuqola abamangali abaningi,” kusho umkhulumeli weNational Prosecuting Authority uLumka Mahanjana.
Kuthiwa uThobejane wanikezela ngosizo kubantu ababedayiselana ngomuzi.
Ngemuva kokufinyelela izivumelwano, abamangali bathumela kuye izimali.
“Ngemuva kokuthola le mali, uThobejane kuthiwa uhlulekile ukwenza umsebenzi, wagcina engasatholakali, wangayibuyisa imali,”
Abamangali babikele iLegal Practice Council okuyiyona evule amacala eziteshini zamaphoyisa ezahlukene.
Icala lihlehliselwe umhla ka-24 November ukuze kuzoqhutshekwa nophenyo lwebheyili.
Izigameko ezifuze lezi iPurpose ibikile ngazo ngonyaka odlule kuyo le nyanga kaDecember.
Sabina nommeli uMicheal Sonotse Mabunda (42) okuthiwa wafaka isicelo sokukhokhelwa kwekhasimende lakhe kwaRAF imali engango R10,562,173.21 nebala yakhala ebhange lakhe.
Noma kunjalo kodwa ummeli akamfakelanga ngisho nesenti umnini wemali lokho kwadala ukuthi umgilwa ahlupheke enemali.
Abophiko lweSerious Commercial Crime Investigation kwiHawks baqala uphenyo bamlandela kancane uMabunda bagcina bemnika amasamanisi.
Okhulumela iDirectorate for Priority Crime Investigation eGoli uCaptain Lloyd Ramovha uthi baqala ukumlandela uMabunda emuva kokunukeka enkohlakalweni.
“Kwaba nombiko okhomba uMabunda ngenjumbana ukuthi unesandla ekungafikeni kwemali yekhasimende lakhe njengoba kunguye owafaka isicelo kwaRoad Accident Fund,” kusho uRamovha.
