U-Advocate Mngomezulu ukhomba uLongwe Thwala ekufeni kwaMeyiwa
Liyah Singela
UTHUSE abaningi u-Advocate Thulani Mngomezulu eveza ukuthi uLongwe Twala owayeyisoka likadadewabo kaKelly Khumalo uye owadubula uSenzo Meyiwa. Uthi kwenzeka lokhu ngesikhathi uLongwe efika edakiwe exabana nentombi yakhe uZandie wase ephunyukwa ivolovolo.
UMngomezulu uze wathembisa iNkantolo ukuthi bakhona ofakazi abangafakaza kulokhu. Lolu qweqwe lommeli belipheka ngebhodwe elincane ufakazi woMbuso owumphenyi wecala uSergeant Batho Mokgola.
“ULongwe wafika edakiwe ephethe ivolovolo waxabana noZandi wadubula kwalimala uMeyiwa, wazidubula naye uLongwe emlenzeni,’’ kusho uMngomezulu.
Uthe kwabe sekukhandwa amanga ukuze kuvikelwe abathile ngokufa kukaMeyiwa.
“Ubufakazi besibhamu obalethwa yiphoyisa buyingxenye yamanga akhandiwe ukuvikela umuntu othile. Yonke lento ikhandiwe futhi umuntu owabulala uMeyiwa akekho la enkantolo’’ kusho uMngomezulu.
UMeyiwa wadutshulwa wabulawa ngabantu abangaziwa ekubo kwentombi yakhe uKelly Khumalo eVosloorus, eGoli ngo-2014. UMngomezulu uthe uMnuz Tumelo Madlala wathinta umlisa okuthiwa wuHlophe ethi uMeyiwa udubuleke elamula uLongwe nentombi yakhe uZandi Khumalo. ULongwe uyindodana kaChicco Thwala owazekhela igama kuleli emculweni, waphrojusa izingoma zomculi ongasekho uBrenda nezabanye abaningi. Phambilini uChicco wake waveza kwabezindaba ukuthi indodana yakhe inezinkinga yokusebenzisa izidakamizwa ngokweqile. Icala liyaqhubeka.
