Isikhiphe isidumbu sowesifazane imvula eThekwini
IMVULA enamandla ehambisana nokuduma kwezulu isikhiphe isidumbu sowesifazane obehamba ngemoto.
Imoto yalo wesifazane iguguleke izolo ebusuku ebhulohweni elikuSarnia Road ePinetown, entshonalanga yeTheku.
Abezimo eziphuthumay be-ALS Paramedics bathi baze bakwazi namuhla ekuseni ukucinga isisulu esineminyaka elinganiselwa ko-50, kwazise isimo besisibi kakhulu ebusuku.
Imvula enamandla igadle kwezwakala ezingxenyeni eziningi eziseningizimu-mpumalanga yeKwaZulu-Natal.
Ilimaze imigwaqo kwezinye izindawo kanti kwezinye bekugcwele amanzi emigwaqweni, kungahambeki, kwezinye kuhambeka kanzima.
AbeSouth African Weather Service kuleli sonto bakhiphe isexwayiso esikusigaba-6 semvula enamandla ehambisana nokuduma kwezulu. Isalindelekile imvula namuhla ngoLwesihlanu ezingxenyeni eziningi zesifundazwe.
UMnuz Zwakele Mncwango ohola i-Action SA KwaZulu-Natal ukhale ngokwehla ngomlenze kwemali yabakhokhintela nokugcina sezingagcinwa izidingo zomphakathi.
“Kade ngisho ukuthi izinhlekele eThekwini zingagwemeka uma uMasipala ungafaka imali kwizidingongqangi okuyizingqalasizinda okubalwa ukugeleza kwamanzi ngamapayipi. Ukube nje R1 billion wenhlekelele ka-2022 awudukanga ngabe wenze omkhulu umehluko,” usho kanje.
Indawo yomtakabani iKloof kanye nePinetown ibalwa kanye nezinye ezikhahlamezekile amanzi angena ageleza nasenxanxatheleni yezitolo.
Kunezimoto ezimukile kanti kuMgeni Road eThekwini akuhambeki nogesi awukho kwezinye izinhxenye zedolobha ngenxa yokulimala kwengqalasizinda.
