Injabulo iChiefs ikhonka udonga ngesiqongqwane
KUNTWELA ezansi kwiKaizer Chiefs okuvela ukuthi imtholile umdlali wasemuva ozoqinisa udonga.
Nakumafolosi iyashoda njengoba isithungatha umgadli obukhali.
IChiefs kubikwa ukuthi isivumelene ngokudayiselana ngomdlali wasemuva wase-Angola, u-Inacio Miguel nePetro de Luanda.
La makilabhu amabili aseziphothulile izingxoxo, avumelana nangemali okuzodayiselwana ngayo lo mdlali.
Manje osekusele wukuthi u-Inacio afike asayine inkontileka kuleli sonto njengoba naye esevumelene neChiefs ngemihlomulo, ngokubika kwe-FARPost.
Lokhu kusho ukuthi iChiefs isisayinise abahlamu kuleli windi lokuhwebelana ngabadlali, kulandela ukufika kukaBongani Sam, uRushwin Dortley, uFiacre Ntwari noGaston Sirino.
Lo mdlali wasemuva, oneminyaka engu-28, okwaziyo ukudlala emuva kwesokudla, ubengumdlali ovelele kwiPetro de Luanda ngesizini edlule kwiligi yase-Angola.
Kuvela ukuthi umqeqeshi uNasredine Nabi kulindeleke ukuthi akhiphe isinqumo ngomgadli olethwe uMike Makaab eqenjini ukuthi limbheke.
