Ingebhe kumfundi (11) kubuya uthisha obembophisile
Sindiswa Nxumalo
USABA ukuyobhala izivivinyo zokuphela konyaka umfundi (11) wesikole eBhekaphambili Primary School, eLamontville, eThekwini.
Lokhu kuza emuva kokubuya kukathisha obeboshelwe icala lokumshaya walimala waze wafaka ukhonkolo lo mfundi esikoleni.
Muva nje usanda kudliswa iwatermelon enoshevu waphuthunyiswa esibhedlela, manje useyasaba ukubuyela eskoleni.
Umfundi utshele ugogo wakhe ukuthi uyesaba ukuya esikoleni njengoba lothisha esephinde wabuya nje.
Ugogo esiligodlile igama lakhe ukuvikela umfundi uzwakalise okukhulu ukukhathazeka mayelana nalolu daba njengoba umntwana ezophazamiseka.
“Umntwana owayeshaywe uthisha esikoleni usesibikele ukuthi uthisha wabuya emuva kweviki esesitokisini. Wadla iwatermelon engayazi ukuthi inoshevu manje useyasaba ukubuyela esikoleni eyobhala njengoba sekuzophela unyaka,” kubika yena.
Uphinde wabika ukuthi ekusukumeleni kwakhe loku daba uthole ukuthi ifayela lecala libhalwe ukuthi livuliwe kodwa phakathi kulo akubhalwe lutho.
Umdidiyeli wehhovisi lezemfundo laseMlazi ubeke umbono mayelana naleli cala.
“Icala liyatholakala emacaleni abikiwe, kulindwe okufanele basayine, kodwa njengoba ingane isigula kuzothintwa umhloli nothishanhloko ukuze bathole ukuthi into edliwe umntwana uyithole eskoleni noma uyidle ngaphambi kokuza eskoleni. Emva kwalokho kuzokhulunywa nomzali osemabhukwini esikole mayelana nenqubekela phambili.
Njengamanje kusalindeleke ukuthi abathintekayo bakhulume baphume nesisombululo maduze,” usho kanje.
Umsolwa kuthiwa wakhipha u-R50 kuphela wokuyisa umgilwa esibhedlela iWentworth kodwa bayinqaba leyo mali.
Ngaphezu kwalokho kuthiwa waqamba amanga wathi izingane bezidlala umacashelana ngesikhathi kwenzeka lesi sigameko.
Okhulumela uMnyango wezeMfundo uMnuz Muzi Mahlambi uthunyelwe imibuzo wafonelwa, kusalindwe izimpendulo esizozibhala uma sezikhona.