Ifu elimnyama eDUT kuzibulala abafundi kulandelana
Sigubezelwe yifu elimnyama isikhungo semfundo ephakeme iDurban University of Technology (DUT) osekuzibulale kuso abafundi kulandelana.
Esigamekweni sayizolo (Lwesine) kutholakale uManqoba Mnyandu (20) odabuka eDumbe ezikhungile.
Lo mfundi ubenza unyaka wesithathu kwiziqu zobuhlengi (male nurse).
Okhulumela amaphoyisa KwaZulu-Natal, uLt-Colonel Robert Netshiunda, ukuqinisekisile ukuphenywa kwecala lesigameko sokutholakala kowesilisa obelenga eduze kwendawo ahlala kuyona eMgungundlovu.
Utholakala esefile nje uMnyandu kuthiwa unyamalale ngoLwesithathu olwedlule ebusuku wangaziwa ukuthi ubhekephi washiya neselula ngemuva.
Ngokwesitshudeni ebesihlala noMnyandu endlini, kwabezindaba sithe siqale ukuqaphela uma kuhamba isikhathi engabuyi endlini, sabe sesibika esikoleni.
Okhulumela iDurban University of Technology (DUT) uMnu Alan Khan, uthe kwenzeka lokhu nje, ngoLwesibili kwenzeke esinye isigameko esishaqise abaningi.
Kuyona le nyuvesi ophikweni oluseSteve Biko, eThekwini, omunye wabafundi uSphiwokuhle Madela uziphonse ebhilidini lenyuvesi eLevel-6, washona.
Lesi sitshudeni senze lokhu phambi kwezinye zibuka. Kuthiwa bezizitshela ukuthi uyadlala ngesikhathi engakaziphonsi, esaphezulu.
Ngesikhathi kwenzeka lesi sigameko, kusolwe izinkinga zoxhaso lwemali iNational Student Financial Aid Scheme (NSFAS), njengoba izitshudeni eziningi zikhala ngokuthi ibachithile, ayiyikhokhile imali.
NB: Marketing & Advertising WhatsApp/Call-073 062 1169
