IChiefs icasulwe isimemezelo sokudliwa esithe
Bahle Mkhize
I-TS Galaxy isuse isivunguvungu ezinkundleni zokuxhumana ngesimemezelo esingatheni esifake ezinkundleni zayo zokuxhumana.
“Namuhla, sidlale umdlalo wobungani neKaizer Chiefs sanqoba ngo 3-0!” ibhale kanje iGalaxy.
Leli qembu laseMpumalanga kungenzeka ukuthi belihlose nje ukwazisa abalandeli bayo ngezakamuva eqenjini.
Nokho abanye babalandeli beChiefs bayibuke ngelinye iso lento.
Basale nomuzwa wokuthi lesi simemezelo besingenasidingo ngoba bekuwumdlalo wobungani, odlalwe kungekho nabalandeli.
Vele amaqembu ayazwana amandla ngalesi sikhathi sokulungiselela isizini futhi akuvamisile ukuthi bese ememezela imiphumela.
IGalaxy yengeze ngokuthi, “Abashaye amagoli kube ngo: Puso Dithejane, Sphiwe Mahlangu, noThokozani Sibanyoni.”
Ayikho eminye imininingwane yalo mdlalo ekhishiwe, kodwa lo mbhalo ubangele ukwethuka kwabanye babalandeli beChiefs.
Sekusele amasonto amabili kuqale iligi yeBetway Premiership futhi abalandeli beChiefs bakhathazekile. Iqembu labo lidonsa kanzima.
IChiefs ihlulwe ngo 4-0 yiYoung Africans yaseTunisia emdlalweni weToyota Cup ngenyanga edlule.
Lokhu kwengeza ekukhathazekeni ngobuthuntu beqembu phambili okuyinto ekhathazayo.
Ngesizini edlule iChiefs ishaye amagoli angu-25 kuphela emidlalweni engu-30 yeligi. Lokhu kuyinkinga edinga ukulungiswa.
Iqembu livele lazithulela nje ngezindaba zokusayinwa kwabadlali kula masonto ambalwa edlule, yize kunamahlebezi ngalo.
Belimataniswa nabagadli abanegama okungo Fiston Mayele noPercy Tau abadlala kwiPyramids ne-Al Ahly e-Egypt.
Nokho umqeqeshi uNasredine Nabi uwaphikile la mahemuhemu kuleli sonto.
Umphathi weqembu uGerald Sibeko yena uqhamuke nodaba oluhlukile, evuma ukuthi uzamile ukukhuluma nomunye walaba gadli.
Ucashunwe kwiwebsite yase-Egypt ethi bazamile ukuxhumana noTau, kodwa wangalubamba ucingo lwabo.
Abalandeli beChiefs bakhathazekile. Bafuna ukubona inqubekela phambili nokusayinwa kwabadlali abasha.
Isimemezelo seGalaxy sandise ukwesaba kwabo ngokuthi leli qembu lisazoqhubeka nokubephula izihliziyo.
Njengoba sekusondelei ligi, iChiefs kuningi okubhekwe kuyo.
Lisenethini
