Bamfuna ehlile oweSAFA obhekene namacala
INHLANGANO iCivil society organisation #NotInMyName International inxenxa umengameli weSouth African Football Association (SAFA) uDanny Jordaan ukuthi ehle esikhundleni.
Lokhu kuza emuva kokuthi elindeleke ukuthi avele enkantolo kuleli sonto ebhekene necala lokweba nokukhwabanisa.
ISABC ibike ukuthi uJordaan wasebenzisa izimali zenhlangano iSAFA ukuqasha inkampani yezokuxhumana ukuze ipende isithombe esihle ngaye. Wakwenza lokhu emuva kwezinsolo zokudlwengula uJennifer Ferguson owayeyilunga lePhalamende kwi-ANC ngonyaka ka-2017.
UNobhala jikele nophinde abe ngumsunguli we#NotInMyName uThemba Masango uthe: “Ekugcineni amaHawks angume ukuthi leli cala lithethwe enkantolo ngoLwesithathu kungenzeka kube namanye amacala azokwengezwa. Sijabulile ukuthi ekugcineni leli cala lisenkantolo. Kusenzeka konke lokho sithi akehle esikhundleni kuze kube wukuthi inkantolo imthola emsulwa,” usho kanje.
Masango uphinde wanxenxa uNgqongqoshe wezemiDlalo, ubuCiko namaSiko uGayton Mackenzie ukuthi abesekw kwikhwelo labo ukuthi akehliswe uJordaan.
Uhulumeni waseNingizimu Africa udinga ukukhuculula ibhodi leSAFA.
