Ziyaqonga izinkinga zikaMogotsi obeseNkantolo
Bahle Mkhize
Ziyaqonga izinkinga zikasomabhizinisi osehlale ezitokisini isikhathi esingaphezulu kwenyanga.
Ngesikathi evele eJohannesburg Magistrate’s Court ngoMsombuluko kuvele ukuthi ubelokhu exhumana nofakazi wombuso yize etokile.
Umphenyi kwecala utshele inkantolo ukuthi omunye wofakazi uphazamisekile nokuholele ekutheni avule icala.
UMogotsi uyaphika ukuthi ufonele ufakazi kodwa nasenkantolo ubonakale ephethe umakhalekhukhwini.
Abammeli bakhe bamphikelile bathi bamunike ngesikhathi efika enkantolo ukuze ezokwazi ukuxhumana nonkosikazi wakhe.
UMogotsi waboshelwa icala lokuzenza umgilwa esigamekweni sokudutshulwa eVosloorus ngonyaka odlule.
Inkantolo ithe izokhipha isinqumo mhla ka-29 June 2026 mayelana nokuthi uyayithola yini ibheyili noma cha.
UMogotsi zamkhalela eqeda nje ukwethula ubufakazi kwiKhomishana kaMadlanga.
Waboshwa ebesebheke ekhaya eNorth West.
Waboshwa yithimba leCrime Intelligence elalijutshwe uGeneral Dumisani Khumalo, abaseshi kanye namaphoyisa ophiko lwePKTT.
Kukholakala ukuthi uMogotsi wayelusiwe usuku lonke ngesikhathi ethula ubufakazi kwi Madlanga Commission.
Uphenyo ngaye selokhu lwaqa kusukela ngoNovember 2025.
UBrigadier Athlenda Mathe okhulumela amaphoyisa kuzwelonke ephawula ngesikhathi eboshwa wathi ithimba lamaphoyisa lithole iJ50 ebagunyaza ukuthi babophe uMogotsi.
“Uphenyo olifushane luveze ukuthi isibhamu esasetshenziswa kwenziwa lobo bugebengu sixhumene namanye amacala abucayi nanodlame okuhlanganisa ukubulala nokuzama ukubulala, ” usho kanje.
Nokho ke ubengaqali ukuvela enkantolo njengoba ngaphambilini wavela futhi.
Marketing and advertising Call or WhatsApp 073 062 1169
