Bekungathi kudlala ifilimu amaphoyisa eqotha abathathu
Bahle Mkhize
Asekuphindile lokho amaphoyisa aseThekwini edubula ebulala abasolwa abathathu ebabulala.
Laba basolwa bazimbele igodi ngokugadla kuqala ngesikhathi behujwa eMariannhill, entshonalanga yeTheku ngoLwesithathu ekuseni.
Abakwasidlodlo bathole umkhondo ngalaba basolwa abebefunwa uthuli mayelana necala lokuthumba, ukukhwabanisa nokuhloma ngezibhamu ezingekho emthethweni.
Babonakele beshayela imoto begudla kuMilky Way Road base bezama ukubamisana.
Abasolwa bathi kwagogo ezola ngeke sizwe ngani asimi, banyathela kakhulu amafutha emotweni bebaleka.
Amaphoyisa nawo athe ngeke sihlulwe yini ngokushayela okuncono asijahane, ngesikhathi kusanuka ithayi akuphelanga mizuzu yasho inganono.
Kushiyane ukwenza yaphuma emzileni imoto yase iphaphalaza yashayisa isihlahla.
Ngesikhathi kwenzeka konke lokhu bekudutshulwana wena owabona ifilimu.
Nokho akukho nelilodwa iphoyisa elilemele. Kube sekutholakala izibhamu ezimbili nenqwaba yezinhlamvu kubasolwa.
Ngomhla ka-15 May iPurpose ibike ngabasolwa abahambe wrongo abebebamba inkunzi behlomile badutshulwa amaphoyisa kwafa ababili kwasinda oyedwa waboshwa.
Lesi sigameko senzeke eClare Estate, eThekwini.
Laba basolwa babonwe amaphoyisa aseSydenham bebamba usomabhizinisi inkunzi emgaqweni uBurnwood Road.
Amaphoyisa abe esebiza abanye ozakwabo ukuzobalekelela.
Kube sekuhujwa laba solwa ngesikhathi bebaleka ngemoto emhlophe yohlobo lweKia Picanto.
Ngesikhathi bebona ukuthi bavalelwa ekhoneni yilapho bezidele amathambo bavulela ngenhlamvu bebhekise emaphoyiseni.
Nawo akazithelanga ngabandayo aphendula ngezulu lezandla ebhekise kubasolwa kwashona ababili kwaboshwa oyedwa.
Marketing and advertising Call or WhatsApp 073 062 1169
