USangweni ukhumbula ukuthi wayilaxaza kanjani iChiefs esesayinile

USiyabonga Sangweni uthi wayeseqede konke neKaizer Chiefs, esesayinile kodwa ‘unina’ wamnqabela, wathi akaye kwi-Orlando Pirates.

Lo mdlali osewathatha umhlalaphansi uxoxe le ndaba ngesikhathi kwethulwa iSiyabonga Sangweni Sports Complex, ngakubo eDondotha.

Uthe yena wayesezitshela ukuthi uzoyodlala kwiKaizer Chiefs njengoba ayesesayinile kuyo.

“Ubaba wayefuna ngidlalele iChiefs, kodwa umama wami wayesondelene kakhulu noMato (Madlala, usihlalo weGolden Arrows).

“Ngaphambi kokuthi umama ashone, wathi yonke into engiyoyenza, wathi ‘nangu umama wakho (ekhomba uMato Madlala) uyena oyokutshela ukuthi wenzeni ebholeni’.

“Ngatshela uMato ukuthi ngifuna ukuya kwiChiefs, wathi ‘Kulungile, uzoya’.

“Mina ngasayina kwiChiefs ngo-2010, ngatshela uMato ngathi, ‘Sengisayinile kwiChiefs, futhi kumele ngiyoqala khona ngoLwesibili’.

“USis’Mato wabe esengitshela ukuthi bayangifuna kwiPirates. Ngadideka ngoba ngase ngiqedile neChiefs.

“Wathi, ‘Khohlwa yilokho, yimi umzali wakho futhi yonke into izohamba kahle nje’. “Ngemuva kwalokho usihlalo (U-Irvin Khoza) wangifonela wathi, ‘Buka la, sengikhulumile nomama wakho.

“‘Wena sewungowePirates manje’ nami ngagcina ngivumile. Ngabe sengiya eGoli siyoqedela inkontileka.

“Yaphela kanjalo leyo ndaba, ngagcina sengiyiNdod’eMnyama… Once and Always (isiqubulo sePirates).

Ebuzwa ngokuthi indaba yeChiefs yaphelela emoyeni nje qede kwathula kanjalo, uthe ucabanga ukuthi izikhulu zavumelana zodwa eceleni.
Impempe