Umlando uvuna iSundowns ezohlangana nePirates kowamanqamu
Nkanyezi Mthembu
NJENGOBA i-Orlando Pirates neMamelodi Sundowns bezibekisele indawo yamanqamu eNedbank Cup, la maqembu azobe esehlangana okwesine kulesi sigaba somqhudelwano womkhumulajezi.
EGqeberha iPirates igudluze iChippa United esibayeni sayo ngo 3-1 eNelson Mandela Bay Stadium ngoMgqibelo.
Ngakusasa eCape Town ompetha beDstv Premiership iSundowns baqhubekile nomgqigqo wabo omuhle ngokukhipha iStellenbosch FC ngo 2-1.
Ngokomlando wePremier Soccer League, izinto zivuna iSundowns njengoba ekuhlanganeni kwayo neSundowns, isinqobe kabili.
Ifayinali yakamuva edlalwe AmaBhakaniya namaBrazillians eMoses Mabhida Stadium ngonyaka odlule emdlalweni owaba nelikhulu isasasa njengoba amathikithi adayisa ubuthaphuthaphu lungakafiki usuku. Zashayana zaze zabukana kwathi uma sekushaywa amaphenathi, amaBhakaniya alala esengompetha be-MTN8 ngamagoli amathathu kwelilodwa.
Unozinti uSipho Chaine waba iqhawe losuku njengoba avimba amaphenathi ezithenjwa zeSundowns ezinjengoTeboho Mokoena.
Ngaphambi kwale fayinali ye-Top 8, la maqembu ayegcine ukududulana kowamanqamu ngo-2007 kwi-SAA Supa 8 khona futhi eThekwini eKings Park Stadium. Igoli likaBrent Carelse lanqobisa iSundowns eyamemezela ukuthi le ndebe iyinqobele isihlabani uGift Leremi owayesanda kuyijoyina esuka kuPirates. ULeremi washona engozini yemoto.
Ngesikhathi kuhlanganwa kwiBobSave Super Bowl ngo-1998, eyadlalwa imilenze emibilu ngenxa yokuthi emdlalweni wokuqala umdlalo waphela zibambene ngo 1-1.
Isigora somgadli waseNigeria uRaphael Chukwu wavula inkundla kwathi uJohn Moeti waqhamuka nelokulinganisa. Sekududulwana futhi emlenzeni wesibili umdlalo waphela zibambene ngo 1-1, uDaniel Mudau eshaya igoli lokuvula inkundla kwaqhamuka uSam Pam nelokulinganisa kwaphoqa kuyiwe kumaphenathi. ISundowns yahlohla amagoli ayisithupha kwathi iPirates yakwazi ukushaya amahlanu, leli qembu laseTshwane lakhala lemuka nale ndebe esibizwa ngeNedbank Cup njengamanje.
