Kwehle iziqhomo kwiStellies iChiefs inqoba

KWEHLE iziqhomo kumqeqeshi weStellenbosch, uSteve Barker okhulume amazwi ayindelelo kuMakhosi ngaphambi kokuqala komdlalo.

UBarker, ngaphambi komdlalo uthe iChiefs iyithuba elihle lokuthi iqembu lakhe liqoqe amaphuzu amathathu.

Nokho la mazwi kaBarker kubonakale esebenza ukugqugquzela abadlali beChiefs abadlale umdlalo wabo ongcono kakhulu kuze kube manje kulo nyaka.

Akuphelanga amahora amangaki wawagwinya amazwi wakhe.

Leli qembu leNaturena elishisa libande lishaye iStellies ngo 1-0 emdlalweni weBetway Premiership e-Athlone Stadium.

Igoli leChiefs lingene ngesiwombe sokuqala lifakwa uGlody Lilepo ophinde waqokwa waba umdlali wosuku ovelele.

Umdlalo ufikile ezingeni ebelibhekwe kuwo, futhi bekungaba yinoma yiliphi iqembu ebelingawunqoba kalula umdlalo.

Nokho kube ubusuku bukaNasreddine Nabi, enqoba umdlalo wakhe wesikhobisa kwengu-17 yeligi.

Yize iStellies bekuyiyo ephethe ibhola esikhathini esiningi, ikakhulukazi ngesiwombe sesibili, Amakhosi awazange abe senkingeni.

Akwazile ukubambelela egolini layo futhi yathola amaphuzu amathathu abalulekile ayikhuphulele endaweni yesine kwilogi.

Amakhosi asenamaphuzu angu-25 ngemuva kwemidlalo engu-17, futhi abukeka ethembisa ukuqhubeka nokuqoqa amanye amaphuzu emidlalweni ezayo.

IStellies ihlezi endaweni yesishiyagalombili ngamaphuzu angu-20 kuphela, inemidlalo emithathu esandleni.
Lisenethini.com