I-Ford Territory entsha izokwethulwa eMzansi
Sindiswa Nxumalo
Inkampani yezimoto iFord, eSouthern Africa isiqinisekisile ukuthi i-Ford Territory entsha izotholakala ngokusemthethweni eNingizimu Afrika emasontweni azayo.
Iletha umklamo omusha kanye nobuchwepheshe obuthuthukisiwe emakethe yezimoto ze-SUV.
Okugqamayo kule moto ukufakwa kweFord App okokuqala, okuvumela abanikazi ukuthi balawule imoto besebenzisa omakhalekhukhwini babo.
Le modeli iphinde ilethe imibala emisha emibili, iCactus Grey ne-Oasis Green.
Le Territory ebuyekeziwe yakhelwe phezu kwempumelelo yemodeli yangaphambilini.
Inikeza ukubukeka kwesimanje okuhambisana nesitayela sama-SUV akwaFord emhlabeni wonke, kanye nengaphakathi elinokunethezeka, elibanzi nelilungele imindeni esencane nenamandla.
Le moto ifakwe injini engu-1.8 litre turbocharged EcoBoost kaphethiloli, ekhiqiza u-138 kW no-318 Nm we-torque, ihambisana nogearbox olunezivinini eziyisikhombisa (seven-speed dual-clutch transmission).
Izici ezifana nezindlela zokushayela ezahlukene, i-adaptive cruise control kumamodeli athile, kanye nobuchwepheshe be-Auto Start-Stop ziqinisekisa uhambo oluhle nolonga uphethiloli.
Ngokungezwa kwezinhlelo zokuphepha ezithuthukisiwe, iTerritory entsha iqhubeka nokukhombisa ukuzibophezela kwaFord ekusunguleni izinto ezintsha.
Amanani kanye nemininingwane ephelele kuzomenyezelwa maduze.
