Iqale ngegiya eliphezulu iBafana kwi-Afcon

Bahle Mkhize

Iwuqale ngegiya eliphezulu iBafana Bafana umqhudelwano i-Africa Cup of Nations (AFCON) ibuya namaphuzu amathathu inqoba i-Angola ngo 2-1 emdlalweni wokuqala kaGroup B.

Amagoli amahle eBafana avalelwe ngu-Oswin Appollis noLyle Foster ngokwehlukana kweziwombe.

Elomthobanhliziyo kwi-Angola lashaywa nguManuel Show kuso isiwombe sokuqala.

UFoster nokuwumdlali odlala kwiBurnley F.C kwiPremier League ugcine eqokwa njengomdlali ovelele.

Umqeqeshi weBafana Bafana, uHugo Broos, ekhuluma nabezindaba uthe bazamile ukugwema ukwehlulwa emdlalweni wokuqala njengaphambilini.

“Sikugwemile lokho, sidlala ne-Egypt emdlalweni olandelayo inkinga yodwa leyo. Noma kunjalo angigculisekanga ngesiwombe sokuqala,” usho kanje

Khonamanjalo, kulo leli qoqo i-Egypt ithele othulini iZimbabwe ngo 2-1 emdlalweni kulo leli qoqo lezimanga kwi-Africa Cup of Nations.

Kulo mdlalo kuyiwe ekhefini iZimbabwe ihamba phambili ngegoli likaPrince Dube.

Nokho atizithelanga ngabandlayo i-Egypt yathola amagoli amabili esiwombeni sesibili avalelwe ngu-Omar Marmoush no-Mohamed Salah.

I-Egypt neBafana Bafana banamaphuzu amathathu kuleli qoqo, kanti i-Angola neZimbabwe basagingqa amaqanda