Idungamuzi emndenini kaZuma ubophana
Morgan Ngwazi
Uhlukane phakathi umndeni kowayenguMengameli uMnuz Jacob Zuma.
Lokhu kuza emuva kokuthi uNkosazana Bongamini Zuma-Mncube esole udadewabo uDuduzile Zuma-Sambudla ngokushushumbisa amalungu omndeni wakwaZuma eRussia.
La malungu kuthiwa abeyothola ukuqeqeshwa okusezingeni lomhlaba.
Esitatimendeni uZuma-Mncube (41) udalule okushaqisayo.
Uthi phakathi kwabantu baseNingizimu Afrika abangu-17 abaqeqeshelwa ukuba “onogada” nababephambili empini abayisishagalombili amalungu omndeni wakhe.
UZuma-Mncube uthi abagilwa baholelwe oPhathe bazithola sebelwa impi ephakathi kwamasosha aseRussia ne-Ukraine ngaphandle kolwazi noma imvume yabo.
Uthi uvule amacala okwephula umthetho iPrevention and Combating of Trafficking in Persons Act, Foreign Military Assistance Act, kanjalo nelokukhwabanisa kukaZuma-Sambudla (43).
Uthi abagilwa iningi labo liphuma KwaZulu-Natal, libuthwe eqenjini likaMnuz Jacob Zuma, uMkhonto Wesizwe (MK).
Umuntu obhekene namacala kodwa uZuma-Sambudla, oyilungu le-MK ePhalamende.
UZuma-Mncube uthe uvule icala lobugebengu embuthweni wamaphoyisa eSandton ngomhlaka-22 November ebhekene noZuma-Sambudla nabanye abantu ababili, uSiphokazi Xuma noBlessing Khoza, “ngeqhaza labo elikhulu kule nhlekelele”.
UZuma-Mncube uthi ngemuva kokucubungula imininingwane namaqiniso ukholwa ukuthi kukhona imithetho yaseNingizimu Africa ephuliwe.
Okhulumela amaphoyisa uBrigadier Athlenda Mathe, ukuqinisekisile ukuthi amacala avulwe wathi lolu daba luzosingathwa ezingeni lesifundazwe.
