Lugobile uphondo eHonchos eqasha abokufika
Liyah Mseleku
Lugcine lugobile uphondo kwiziphathimandla zezitolo ezidayisa inyama yenkukhu echochobalisiwe iHonchos.
Abakwa Honhcos bagcine bevumile ukuthi baqashe abantu bokufika abangenawo amaphepha okuba eSouth Africa.
IHonchos ikhiphe isitatimende ngokubambisana neMK ivuma induku izibophezela ekufukuleni abantu baseNingizimu Africa.
Bavumelene ngokuthi abantu baseSouth Africa abazoqashwa okwamanje bangu-100 bazoqala ngoMsombuluko.
Ngeke yenziwe inhlolokhono abangawazi umsebenzi bazofundiswa khona.
“Isigwebo esibanike sona ukuthi ngoJanuary, kumele bathengele izingane (180) zesikole eziswele umfaniswano wesikole kusuka phansi kuya phezulu,”
“Saphinda sathi kumele njalo ngoLwesibili noLwesithathu benkele ngokudla emndeni eswele engu-150. Konke lokho bakuvumile”
“Kuzoba nomuntu weMK LACO esizomqoka okuyena ozobheka ukuthi ngabe konke kwenzeka njengoba sivumelene yini” kusho isitatimende.
Bonke oHonchos bazovulwa beqhubeke nokusebenza, abasebenzi bazoyihola yonke imali yabo iphelele.
Uma kuba khona ongawutholanga umholo ophelele iMK ivivile.
Phambilini kuvele ukuthi uQiniso Cibane ozibiza ngoMengameli weMK Youth League, uthi amaNdiya aseHonchos abemlekelela ngemali kwizinto zeMK ucela ayekwe.
“Okungcono uzosikhulumela asinike nathi imali, yonke leyonto sayinqaba ngoba esikwenzayo asikwenzeli imali kodwa abantu base South Africa ukuthi abathole umsebenzi”
“NgoMsombuluko uHonchos ufike noR150k kuthina wathi ucela siyeke lento yeshutdown sayinqaba, izolo futhi bathi sebeyinyusile sekuR300K sayinqaba sathi abaxoshe abantu bokufika beqashe abase South Africa ilokho esikufunayo thina”
“Sathi leyomali abafuna ukusinika yona abanike abasebenzi beyifake kuma bhonasi” kusho uMlungisi KaMancinza.
