Kudutshulwe osomatekisi bebuya ethaveni

Morgan Ngwazi

Kudutshulwe kwabulawa abashayeli bamatekisi ababili bekade beyophuza utshwala ethaveni esendaweni.

Laba bashayeli okusolakala ukuthi bebengabangani batholwe bedutshuliwe bedindilizile emgwaqeni oseMagwaveni, oThongathi ezintatha zangoMsombuluko.

Inkampani yonogada iReaction Unit South Africa (RUSA) Tongaat Operations Centre ithumele abasebenzi bayo kulandela ukuthola imibiko yokudubula.

Ekufikeni kwawo amaphoyisa athole izidumbu zabesilisa ezimbili zihlukene ngamamitha ukusuka komunye uya nomunye.

Ngokusho komphakathi, kuzwakale ukuqhuma kwesibhamu ngehora lezibili ntathakusa.

Ngemuva nje kwesikhashana, abesifazane abane baphuthume konogada bahlaba umkhosi.

Bachaze ukuthi bebephuza utshwala nezisulu kwaze kwabe intathakusa.

Laba besilisa ababili babe sebehamba bebuyela emakhaya ukuyolala kanti ababuzanga elangeni sebelalelwe unyendle.

Abashonile kuqinisekiswe ukuthi bangabashayeli bamatekisi, imbangela yalokhu kubulawa kwalabantu ayikaziwa.

Khonamanjalo, ushaqekile umndeni Thandolwethu Mahlangu oneminyaka yobudala eyisikhombisa obedukile e Mpumalanga, eDelmas wabe esetholwa ebulewe.

Ngaphambi kokuthi atholakale, umama wakhe u-Ayanda Ngwenyama uthi umbulali wendodakazi yakhe umbhalele umyalezo ethi uyababona njengoba bathungatha ingane.

Uqhube wathi: “Sesiyibulele lenja yenu, angazi noma ufuna sikulethele isidumbu yini,” kusho unina wongilwa.

Uthi nangempela ingane ibe seyitholakala eduze komuzi wesihlanu ukusuka kubo.

Uphinde wathola omunye umyalezo uthi abakaqedi.

“Asikaqedi, uma ningawukhokhi u30k wami ngizobulala nalena encane elama le, niyoze nikhokhe”

Amaphoyisa abe esebuza abazali ukuthi ukhona yini umuntu abamkweketayo baphika bama ngentaba.

Bathi omashonisa abathathu abake baboleka imali kubona, yakhokhwa yonke.

Amaphoyisa agasele kulabo mashonisa eyobabuza bafike bathi imali eyayibolekiwe wuJabu okuyise wengane seyakhokhwa.