Ushisa phansi umbango wobukhosi kumaBhaca
Ongeziwe Ntondini
Isizwe samaBhaca, eMzimkhulu, sesiveze ukunganeliseki kwaso ngesinqumo esithathwe uNgqongqoshe weCooperative Governance and Traditional Affairs (COGTA), uRev Thulasizwe Buthelezi.
Lesi sizwe sikhulume nabezindaba eGarden Court Marine Parade Hotel, eThekwini, lapho bekucaciswa khona “ukudideka okukhulu kwezamasiko nokuphathwa” okwenzeka kwaNongoma.
Lokhu kumayelana nokufakwa kweNkosi yesihlanu endaweni yaseMfulamhle ngaphansi kweSilahla Traditional Authority.
UMntwana uMandilakhe Msingapantsi, okhulumela umndeni wakwaBhaca, uthe:
“Asisoze samvumela uXolani ukuba ahole, lokhu kuphambene nomthetho wethu wobukhosi, noma ngabe uMEC ufuna kanjalo,”
Ngokwesizwe samaBhaca, ukufakwa kukaXolani Zulu njengenkosi entsha akukho emthethweni ngoba bathi azikho izizukulwane zakhe ezimnika ilungelo lobukhosi.
“Uyise kaXolani wayeyinduna, hhayi inkosi,” kusho uMsingapantsi, echaza ukuthi lesi sinqumo sihlambalaza amasiko nobuholi besiBhaca.
Abaholi bamaBhaca bathe badumele ngendlela uMEC aphathe ngayo lolu daba.
Bathi lesi sinqumo senziwe ngaphandle kokubonisana ngokwamasiko futhi siphula umthetho wobuholi Bendabuko kanye nezindlela zokuphatha.
UNdabezitha Msingapantsi, inkosi ekhuluma egameni labaholi baseMfulamhle ngaphansi kweSilahla Traditional Authority, uthe:
“Mina ngiyinkosi ebusayo ngaphansi kweMfulamhle Administrative Area eMzimkhulu, futhi ngokwamasiko ethu, asinakuba namakhosi amabili abusayo ngesikhathi esisodwa.”
Isizwe samaBhaca sesibize uMnyango weCOGTA ukuba ubuyekeze ngokushesha lesi sinqumo.
Baxwatise ngokuthi ukufakwa kwenkosi entsha kungadala izingxabano ezingadingeki futhi kube yingozi ekuqiniseni izinhlelo zobuholi bendabuko ezikhona.
