Sihle Mkhize
Umsakazi woKhozi weFM osanda kudla umzila kaSipho “Sgqemeza” Mbhatha uzwakalise ukuzwelana naye.
UVee Mthembu obekhuluma nePurpose uthi uSgqemeza insizwa ayikhonzile futhi ayaziyo.
Yize kunjalo, uthi ubengakaze athole ucingo noma umyalezo ovela kuye emhalalisela.
“Ngiyakhumbula ukuthi uSgqemeza wake wangiqinisa idolo enginika namazwi angikhuthazayo ukuthi ngelinye ilanga ngiyophumelela,” kubeka uVee.
Uveze nokuthi kube nzima ukuthi angene ezicathulweni zakhe futhi akaziswanga ngesikhathi eqashwa ukuthi uyodla umzila kabani.
“Ngangizitshela ukuthi kukhona engizobambisana naye hhayi ukuthi ngizongena esikhundleni sikaSgqemeza”
“Ukuthi kwenzekani kubaphathi angazi ngabe sengiyagxambukela nje” kuqhuba uMthembu.
Uphinde waveza ukuthi usemeninyaka engu-20 kwezikaqeda isizungu njengoba agqama ohlelweni lakwiTV Imizwilili.
Isipiliyoni sokusakaza usithole kwiJozi FM nathi uyohlezi eyibonga.
Khonamanjalo, ukhala ezimathonsi uDJ Sgqemeza ngokuxoshwa Ukhozi FM.
Uveze ukuthi akulona iqiniso ukuthi uzicelele ukuhamba, lokho amanga enziwe kusetshenziswa izintatheli ukuze kube engathi uzicelele.
Udalule nokuthi lowo mphathi useyamazi kodwa waligodla igama lakhe.
“Izizathu abazishilo, nginqena nokuzisho la, ukuhlonipha u-SABC nesithunzi soKhozi FM.
“Kodwa ihlazo ukuthi isiteshi esingaka singasebenzisa amampunge ukuthatha izinqumo,” kubalisa uSgqemeza.
Ucele ukuthi abazalwane behlise umoya bakhumbule ukuthi ababambene nanyama nagazi.
