Izwi leSilo ngabokufika abadelelayo kwaZulu
Sihle Mkhize
Selusetshenzwa yiSilo uMisizulu kaZwelithini udaba labokufika abakuleli asebekbombisa indelelo ekubeni benganawo amaphepha.
Ukubhekana ngeziqu zamehlo phakathi kwabakuleli nabokufika kugqame ngesikhathi umholi weMarch and March uJacinta Ngobese-Zuma engaphandle kwasemasangweni ase-Addington Primary School eThekwini.
UJacinta ubelwelwa ukuthi kusizakale izingane ezingenazo izikhala zokufunda ekubeni ezangaphandle zifunda kuvulwa izikole.
Bebebhekene ngeziqu zamehlo kuvimbe iphoyisa phakathi nendawo imimoya iphezulu.
“Nina beSilo iMbube ingithunile, ngokuzwa imvunge la ngaphandle ukuthi kukhona okungabaphethe kahle kube kufanele ngoba kuzwakala sengathi abantu bokufika ikakhulukazi labo abahlezi ngokungemthetho sebesiphuze inyongo”
“Baze beqa bakhombisa indelelo kubantu bakwaZulu. Kuyaziwa ukuthi uhulumeni waphumela obala ukuthi abantu abakuleli lizwe ngokungemthetho nabadayisa izidakamizwa abenza konke okungalungile , usemkhankasweni wokuthi babuyele emakubo”.
“ISillo sibambisene nohulumeni sithi akungabi bikho ukudelelana lokhu esikubonayo. Ukhona umthetho ovumela abantu ukuthi uma beza ezweni ngaphakathi yimiphi imiqathango okumele bayilandele nendlela yokuziphatha”
“Sizwa izinkulumo ezivusa uhlevane ezenza abantu bathukuthele. Ithi ingonyama amaphaphu phansi Zulu iyalusebenza lolu daba izokhukuma ngalo kabanzi eSandlwana ngoLwesine” kusho uMntwana uThulani Zulu.
