I-Oparations Gijima ikhuculule abokufika abangena twa
Philasande Luthuli
Bakhalelwe amasongo kaSigonyela abalisa abahlanu bokufika kuleli abatholakale bengenawo amaphepha abagunyaza ukuba kuleli ngokusemthethweni.
Balale bebaliwe izolo ngesikhathi kuqhubeka umkhankaso kaMasipala weTheku, i-Operation Gijima, kuWard 78, 82, 83, no 85 eMlazi, ezigcemeni zakwa- H, J, K, N, M, L, P, U, W nakwa Z.
Kuphinde kwakhishwa nezinhlawulo ezingaphezulu kuka-R2000 kulabo abatholakale bengalandeli imithetho elawula ukusebenza kwamabhizinisi kahulumeni.
Lo mkhankaso uqale mhlaka 6 October 2025, kanti uzophothulwa mhlaka 10 October 2025, uholwa yihhovisi leSupply Side and Area-Based Operations, eMlaza.
Nomkhankaso i-Operation Good Hope kuWadi 80 eMlaza, ezigcemeni zakwa-A, B, E no-V uqale ngegiya eliphezulu maphakathi nenyanga kaSeptember.
Lapha kuboshwe abanikazi bezitolo abathathu abatholakale bengenawo amaphepha okuba kuleli zwe.
Abanye bahlawuliselwe ukudayisa ukudla okudlulelwe yisikhathi, ukusebenzela ezakhiweni okungavumelekile kusetshenzwe kuzo, nokungalandeli imithetho yenhlanzeko.
Kuphinde kwalungiswa ingqalasizinda yamanzi neyokuthuthwa kwendle, imigwaqo, ugesi, kwaqoqwa imfucuza, kwanqunywa utshani, nokunye.
Lo mkhankaso, oqale ngomhla ka-15 September, ugoqwe ngomhla, ubuholwa yihhovisi leSupply Side and Area Based Operations, eMlaza.
Khonamanjalo, ziyaqhubeka izinhlelo zokukhuculula i-Albert Park nezindawo ezisondelene nayo.
Kuzokhumbuleka ukuthi le paki ibisisatshwa kwazise ibisihlala amaphara abamba abantu inkunzi.
IKhansela uProtus Mngonyama uthe ukutshalwa kokudla, ukwakha amathuba omsebenzi kanye nokuqinisekisa ukuphepha komphakathi yikhona okusemqoka.
