Ubugingqigingqi bezidumbu eKZN amaphoyisa ebulala abasolwa
Liyah Mseleku
Kudutshulwe kwabulawa abasolwa ababili ngesikhathi amaphoyisa asesifundazweni saKwaZulu-Natal enomkhankaso wokufuna abasolwa abayingozi.
Lo mkhankaso ubuselokishini esiseningizimu yeTheku uMlaza.
Kuvele ukuthi laba solwa abaneminyaka engu-27 no-30 bebefunwa uthuli mayelana namacala ahlanganisa ukugqekeza nokubamba inkunzi kuhlonyiwe eningizimu nesifundazwe saseKZN, eHarding.
Umkhondo wamaphoyisa uwaholele emijondolo yasehostela iGlebelands, eMlaza nalapho befike bahlangana nezimbila zithutha ziholwa emhophe phambili.
Abasolwa kuthiwa bavulele ngenhlamvu bengaphakathi emjondolo kwahlephuka ukhethe.
Amaphoyisa akazibekanga phansi nawo abuyisela ngomlilo basala enkundleni abasolwa.
Kube sekutholakala izibhamu ezingekho emthethweni nezinhlamvu endaweni yesigameko.
Amaphoyisa asazama ukubalumbanisa labasolwa namanye amacala okubalwa ukuphanga kuhlonyiwe namanye amaningi.
Kwenzeka lesi sigameko nje bekusaphele inyanga kudutshulwe abasolwa ababili abebedubulana namaphoyisa eNanda, eThekwini.
Amalungu eNanda SAPS Task Team, Inanda Vala Group neNanda Crime Prevention bebelandela umkhondo wala madoda.
Kuthiwa abasolwa bebecashe endlini thizeni Emaplazini kanti bebefunelwa uhide lwamacala okubanjwa kwenkunzi kuhlonyiwe.
Ngokombiko wamaPhoyisa athi abingelelwe ngenhlamvu nawo aphendula ngayo nokho abasolwa abakwazanga ukusinda.
Kube sekutholakala isibhamu esingekho emthethweni kanti amaphoyisa asala ephenya.
